إزاى تتعامل مع الأيجينسى فى 2023 

المره الفاتت شرحنا ليكم إزاى تختار ماركتنج إيجينسى للبيزنس بتاعكم فى مراحله المختلفه وإيه أنسب الحلول لكل مرحله وإنه مهم جداً تختار مكان مهتم فعلاً بشغلك مش مجرد مكان حابب يبيع خدماته وبس.
لو ما قاريتوش نصايحنا المره الفاتت تقدروا تشوفوها هنا 

المره دى بقى هنشرحلكم بعد ما تختاروا الأيجينسى إزاى تتعاونوا مع بعض وإيه التعمله بالظبط قبل ما تبدأوا فى الشغل لأن مشكله كبيره بتواجه الطرفين هو عدم توفر المعلومات الكافيه للطرفين وده بيأدى إنه الشغل مايكونش مظبوط أو مايحققش النتايج المطلوبه وهيرجعك كصاحب بيزنس لنقطة الصفر والأيجينسى هيكون عندها مشكله فى الحفاظ على العملاء بتوعها.

لو ده أول تعامل ليك مع إيجينسى هتسمع مصطلح إسمه البريف ممكن يكون بالنسبالك غريب وهتحس إنه مطلوب منك حاجه مستحيله لكن هو بسيط جداً ومهم جداً جداً جداً.
البريف هو أهم حاجه هتتعمل لما تيجى تتعامل مع إيجينسى وهو عباره عن إنك بكل بساطه هتبدأ تشرح البيزنس بتاعك ده إيه وبيعمل إيه وحابب يوصل لفين الفتره الجايه ولازم تاخد بالك من حاجه فى منتهى الأهميه وهى إن أهدافك تكون مناسبه لأمكانيات البيزنس بتاعك وتكون متفهم حجم الأيجينسى البتتعامل معاها لأنك لما بتحط أهداف غير واقعيه وصعب تحقيقها ده بيحكم على العلاقه بينك وبينهم بالفشل لأنهم ببساطه مش هيقدروا يحققوها.

ثانياً بقى  لازم تكون واثق فى الأيجينسى الهتكون بتشتغل معاها لو مافيش بينكم ثقه يبقى مش هينفع تشتغلوا مع بعض و ده ببساطه لأنك محتاج تشرحلهم تفاصيل كثيره عن طبيعة شغلك وإزاى هتحقق أهدافك ومدى قدرتك على الأنفاق فى حاجات متعلقه بالتسويق, كمان هتكون محتاج تسمع منهم أرائهم وإيه الطرق المختلفه الممكن توصلوا بيها لهدفكم لأن من منظورهم للوضع الحالى فى حاجات ممكن يقدموها أو إقتراحات ممكن يقترحوها تكون أفضل خصوصاً إنهم عندهم خبره إنت محتاجها

ثالثاً لازم تحدد معاهم قناه للتواصل وإزاى تقدروا توصلوا لبعض وكمان أوقات التواصل دى إيه, لو متخيل إن دى حاجه مش مهمه خلينا نوضحلك إنها مهمه جداً, لأن ببساطه لو مفيش إتفاق مسبق التواصل هيكون إزاى وإمتى هيحصل عشوائيه كبيره جداً فى نقل المعلومات ما بينك وبين الايجينسى وده هيخلى فى خلل فى المعلومات ويخليها ناقصه كمان هيصعب ويطول مدة الوصول بينك وبينهم يعنى مثلاً هتلاقى شوية معلومات مبعوته على واتس أب وشوية تانيين موجودين فى الأيميل وكلمت حد ماردش عليك فأضطريت تكلم حد تانى ففى الأخر المعلومات مش مترتبه و الأشخاص البيوصلوها مختلفين ومافيش نظام إطلاقاً على عكس لما تكونوا متفقين إن دايماً الحاجات هتتبعت على الأيميل وهيحصل كل مده معينه بينك وبين الأيجينسى مكالمة تلفون توصلك الشغل إيه مستجداته وكمان هيكون فى ميتينج كل أسبوعين مثلاً علشان تتناقشوا فيه مع بعض.

رابعاً بقى مهم جداً إنك تدى الأيجينسى المساحه المحتاجاها علشان تعمل ليك أفضل شغل ممكن, لو كنت نوع الكلاينت الدايماً بيحاول يتدخل فى كل التفاصيل ماننصحكش تعمل كده لأن ده هيقيد جداً الأيجينسى البتتعامل معاها وهيخلى مجهدهم الأكبر يروح فى التعديلات وهيضيع منك وقت كنت ممكن تستفاد بيه فى تحقيق نتائج.
مش معنى كلامنا ده إنك توافق على كل حاجه إحنا بس بنوضحلك إن فى حاجات هما هيكونوا أحسن فيها ولو ليهم مساحة التصرف فى حاجات ليها علاقه بتخصصهم ده هيخلق مناخ كويس ليهم إنهم يطلعوا ليك أفضل النتائج.
لازم تتعامل مع الأيجينسى إنهم جزء من الفريق بتاعك مش مجرد طرف تالت بيقدم الخدمه وخلق المناخ الكويس ده هيكون جزء من شطارتك كصاحب بيزنس و مدير, خليه دايماً جوا حساباتاك.

Leave a Comment

Your email address will not be published. Required fields are marked *