ثلاث عوامل يساعدوك تختار الماركتنج إيجينسى المناسبه فى 2023

كثير مننا لما بيكون عنده بيزنس خاص بيه بيكون أغلب الوقت بيفكر انا هعمل إيه فى التسويق, السؤال ده إجابته مش سهله على أغلبنا خصوصاً لو كنت عامل بيزنس وخلفية دراستك كان مجال مختلف زى الهندسه او غيره, وخلينا نوضحلك إن لو بتفكر تعمل كل حاجه بنفسك خصوصاً لو ماعندكش خبره كفاية ده هيكون أكبر غلط وهتكون محتاج تراجع نفسك وتفهم إن التسويق مش زى ما بتفكر إنه بوست بينزل على السوشيال ميديا او بوست ممول لكنه علم كبير والسوشيال ميديا دى أداة من أدواته ليها إستخدامات كثير وكمان ليها معايير للأستخدام متعلقه بنوع البيزنس والعملاء, لو إقتنعت تعالى نكملك ونعرفك بقى مين اليقدر يشتغل معاك فى التسويق عشان يساعدك.
إحنا قسمنا البيزنس ل 3 أنواع, بيزنس حجمه صغير وبيزنس حجمه متوسط وبيزنس حجمه كبير
كل نوع من الأنواع الثلاثه هيكون ليه طريقة تتعامل بيها فى التسويق الخاص بيه خلينا ناخدهم بالترتيب من الصغير للكبير

أولاً بيزنس حجمه صغير
فى المرحله دى من حجم البيزنس بيكون الشخص تايه ومحتاج مساعده فى يعمل إيه وزى ما وضحنا قبل كده إنه لو ماعندكش خبره كفاية ماينفعش تكون إنت الشخص اليقوم بعملية التسويق وحتى لو عندك خبره كفاية فى أغلب الأحيان مش هيكون عندك الوقت الكافى إنك تدى التسويق حقه.
فى المرحله دى لازم يكون تفكيرك حوالين حاجه واحده وهى إزاى البيزنس بتاعك يبدأ يدخل فلوس فى أقرب وقت أو يعنى بالمعنى العلمى تسريع دورة رأس المال وده هنا و الهدف بتاعك.
فى غلطه تانيه ممكن تقع فيها وهتكون على النقيض من الغلطه الأولى وهى إنك بدل ما تعمل كل حاجه بنفسك تقرر تروح لأيجنسى كبيرة تعملك شغلك وهنا على عكس ما يبان إن ده القرار الصح لأنك بتدى العش لخبازه لكن ده مش هيكون أحسن قرار فى مرحلة البيزنس ده لأنك هتتحمل تكلفة عالية جداً لخدمات مش هتكون محتاج أغلبها دلوقتى.
الحل إنك تختار إيجينسى حجمها مش كبير تقدر توفرلك خدمات معينه هتكون محتاجها دلوقتى زى مثلاً حملات إعلانية تساعد العملاء بتوعك يوصلوا لمرحلة إتخاذ القرار المحتاجه بصوره أسرع.

ثانياً بيزنس حجمه متوسط
فى االمرحله دى من حجم البيزنس إنت كشخص صاحب بيزنس بكون الرؤيه واضحه ليك أكثر ويتكون فهمت حاجات كثير منها القدره التسويقيه للبيزنس وإحتياجاته المختلفه فى المرحله دى وهدفك بيكون إستمرار النجاح والتوسع وعشان تقدر تحقق ده هتكون محتاج تركز فى عمليات تانيه مهمه زى التسويق بالظبط.
هنا أفضل قرار تاخده إنك تدور على إيجينسى بتقدم خدمات مختلفه ومتميزه فى العنصر الأبداعى وتبدأ تشرحلهم إيه هى أهدافك لمده زمنيه معينه فى الأغلب بتكون 3 شهور وتسيب ليهم مساحة التصرف فى الجزء الأبداعى وكل الهيكون بيربطك بهم هو النتايج وهل حققنا الأهداف بتاعتنا ولا لا.

ثالثاً بيزنس حجمه كبير

لو إنت وصلت بالبيزنس بتاعك للمرحله دى فى الأغلب مش  هتكون محتاج مننا نصايح كبيره لكن إحنا حابيين نوضح لكم أكثر.
فى المرحله دى إنت هيكون عند فريق كامل مختص بالتسويق وهيكون جزء من شغله إنه بيختار إيجينسى لكل تفصيله فى التسويق يعنى كمثال هتبدا تشوف حسب إحتياجاتك التسويقيه والميزانيه المخصصة للتسويق إيه أفضل مكان يقدر يقدملك الخدمه دى لو كانت حاجه ليها علاقه بالتسويق الألكترونى أو السوشيال ميديا او لو بحوث تسويق أو حتى لو حمله إعلانيه معينة.

الأهم بقى من كل ده هو أياً كانت إيه هى مرحلة البيزنس بتاعك لما تحب تختار إيجينسى لازم تختار الأشخاص المهتمين بالبيزنس بتاعك والحابين يساعدوك تحقق أهدافك بجد مش مجرد بيبعوا ليك خدمه بيقدموها.
كمان مهم جداً إزاى هتشرحلهم خدماتك ومحتاج إيه بالظبط لو مش عارف هتعمل ده إزاى فإحنا هنشرحهولك المره الجايه خليك مستنينا.

1 thought on “ثلاث عوامل يساعدوك تختار الماركتنج إيجينسى المناسبه فى 2023”

  1. Pingback: إزاى تتعامل مع الأيجينسى فى 2023  – Ace Tech

Leave a Comment

Your email address will not be published. Required fields are marked *